عسَّالون مو مجرد متجر عسل !
عسَّالون تأسست لحل أهم مشكلة في سوق العسل ، وهي : "كيف أقدر أوصل لعسل أصلي وأتأكد إنه مو مغشوش؟" ، القصة بدت في سبتمبر 2019 لما فاجأت كورونا الجميع وماكان وقتها فيه أي لقاحات ، في ذاك الوقت ماكانت عسالون موجودة ، وكنا نشتري مثل كل الناس أي شي طبيعي يرفع المناعة مثل العسل والليمون والزنجبيل .. لكن لقينا صعوبة كبيرة عشان نوصل لعسل أصلي نثق بأنه طبيعي 100% خام من المناحل وما تعرض لأي غش أو تلاعب..
وهنا بدينا نفكر .. كيف نقدر نحل هذي المشكلة اللي يعاني منها معظم الناس .. توجهنا لسوق جملة العسل ، وكنا ندخل للمحل ونطلب منه أفضل وأجود نوع من عسل السمر ، وإذا عطانا أفضل ما عنده نطلب منه جودة أعلى ، وإذا ما لقى شي أفضل يدلنا على محل ثاني أفضل منه ، ونروح للمحل الثاني ونكرر الطريقة ، إلى أن وصلنا لأفضل واحد في السوق دلونا عليه أصحاب المحلات ، وطلبنا منه الدرجة الأولى من عسل السمر ، وباعنا إياه بسعر مرتفع ، وحاولنا نخفض السعر لكن أصر على السعر المرتفع لأنه درجة أولى.
أخذنا العسل وتوجهنا إلى مختبر جودة العسل .. وانصدمنا بالنتيجة ..
العسل مغشوش !! وماكان عسل سمر أصلاً .. كان خليط عسل سدر وعسل الخلنج !!
ومتعرض للحرارة لدرجة إنه صارغير صالح للاستهلاك الآدمي !!
هذا اللي دلونا عليه وقالوا إنه أفضل محل بالسوق .. كيف البقية؟!
وبعدها قررنا إننا نحل هذي المشكلة لنا ولغيرنا .. وبدينا نبحث عن أفضل الطرق لكشف غش العسل .. ولقينا في الانترنت عشرات الطرق الشعبية اللي اكتشفنا إنها غير صحيحة.. مثل السكب على الرمل أو الورق أو حرق العسل أو وضعه في الفريزر أو عند النمل .. إلخ .. كل هذي الطرق ما عليها دليل علمي وفندها كثير من النحالين.
وخلصنا إلى أنه ما عندنا إلا طريقتين ..
الأولى المختبرات المتقدمة .. لأن المختبرات العادية تعدي منها طرق الغش المحترفة .. وبحثنا عن أفضل المختبرات في العالم .. ولقينا إن أفضل المختبرات المتقدمة موجودة في ألمانيا .. وبحثنا عن أفضل مختبر هناك معتمد من هيئة الغذاء والدواء .. ولقينا مختبرات QSI وأرسلنا لهم عشر عينات من العسل ، وبعد ما وصلتنا النتيجة منهم عرفنا أفضل المناحل اللي فعلاً تقدم عسل أصلي خام وغير مبستر وتعاقدنا معها.
الطريقة الثانية إننا نروح للمنحل ونحضر فرز العسل مع النحال اللي ناخذ منه العسل عشان نتأكد إنه يغذي النحل على زهور الأشجار مو على تغذية سكرية.
وبعد ما ناخذ العسل نعبيه في معامل مصرحة من هيئة الغذاء والدواء تعبئة آلية عشان ما تمسه الأيدي ، وفي عبوات زجاجية عشان ما تتفاعل مع العسل ، ونخزنه في مخازن مبردة ونوصله توصيل مبرد عشان يوصل للعميل بكامل فوائده العلاجية.
وحطينا مع كل عبوة كرت فيه نتايج الفحص في المختبرات ، وعشان احنا مطمنين تماماً إن العسل جودته عالية حطينا عليه ضمان ذهبي .. لو ما عجب العميل يسترجع كامل مبلغه .. حتى لو خلص العبوة بالكامل .. كثير انتقدونا وقالوا حتخسروا .. لكن الحمدلله .. مع إننا فتحنا الضمان لمدة 100 يوم من تاريخ الشراء .. معدل الإرجاع من يوم ما بدينا لليوم أقل من 2% ولله الحمد. وبالعكس .. لما حلينا مشكلة الناس في العسل المغشوش وقدمنا لهم عسل أصلي طبيعي من المناحل صار اللي يشتري يحس بالفرق و يرجع يكرر الشراء وبعضهم يدل أقاربه وزملاه علينا .. واليوم الحمدلله صار عندنا قاعدة عملاء فيها أكثر من 18,000 ألف عميل.